Fshati Blush ndodhet 24 km nga qyteti i Ersekës dhe jo shumë larg fshatit të madh Luaras. Në këtë fshat aktualisht jetojnë 22 familje me rreth 80 banorë të cilët merren kryesisht me bujqësi dhe pak blegtori. Problemi kryesor i banorëve është mungesa e ujit të pijshëm. Dikur ky fshat ka pasur një ujësjellës me tuba eterniti i ndërtuar në vitin 1969, por është prishur dhe banorët janë të detyruar të shkojnë me kafshë të mbushin në burimet që janë afër lumit Osum. Për blusharët, problem mbetet dhe riparimi i dy urave pasarelë që kanë mbi lumin Osum, të ndërtuar shumë vite më parë. Bëhet fjalë vetëm për 4 m3 lëndë drusore. Mbrapa nuk mbetet as rruga automobilistike, vetëm 4 km rrugë e pashtruar me asfalt që të lidhen më pas me fshatin Luaras. Pikërisht rruga e keqe dhe mungesa e një dyqani në fshat, i ka detyruar banorët që njëherë në muaj të faturojnë një fugon me ushqime të ndryshme nga Erseka. Në gjithë fshatin vetëm një banorë ka makinë dhe ai ankohet se është makina e tretë që ai ka në përdorim, pasi dy të parat i janë prishur nga rruga e keqe. Ky fshat vuan edhe mungesën e mjekut e për rrjedhojë banorët për të marrë shërbim mjeksor duhet të shkojnë në Ersekë.