Njësia Administrative e Ishmit në dilem me 'malet' e plehrave që prej dy muajsh janë grumbulluar ku të munden. Disa banorë u ankuan në Fiks Fare ku midis tyre edhe një çift amerikan, pasi prej muajsh në fshatin e tyre vetëm 10 km larg Gjirit të Lalzit nuk hiqeshin plehrat. Banorët ngritën zërin se përveç pandemisë edhe masivet me plehra nuk po i lënë të qetë. Në shtëpitë e tyre nuk rihet nga era kundërmuese që shkaktojnë ato, duke i shtuar këtu edhe faktorin mot me temperatura të larta. Shqetësim për ta është edhe diegia e tyre. Vetë administratori i njësisë Ishëm u shpreh për Fiks Fare se mbledhja e plehrave tashmë ka kaluar në përgjegjësi të Bashkisë Durrës , pas ndërprerjes së kontratës me firmën që kishte fituar tenderin për pastrimin e tyre. Por bashkia nuk ka aq mjete sa të mbulojë gjthë zonat ndaj është krijuar edhe kjo situatë. Gjithshtu pengesë është bërë edhe rruga e gjatë për t'i grumbulluar në landfillin e Sharrës, pas mbylljes së Porto Romanos.