Prindër dhe fëmijë të fshatit Murqinë në Krujë u ankuan në emisionin Fiks Fare se prej 10 ditësh fëmijët ecin 11 km në këmbë për të shkuar në shkollë. Ata tregojnë se shkolla e fshatit të tyre është mbyllur para 3 vitesh për shkak të rënies së numrit të nxënësve, dhe në atë kohë fëmijët i çuan në një fshat ngjitur, në fshatin Bilaj, por që shkolla e këtij të fundit u dëmtua nga tërmeti i 26 nëntorit 2019 ndaj fëmijët i dërguan në Fushë Krujë. Transporti bëhej me furgon i cili paguhej nga shteti. Por prej 10 ditësh furgoni nuk shkon t'i marrë, pasi sipas shoferit nuk ka marrë pagesën për shtatorin dhe tetorin. Fiksi kërkoi një përgjigje në Zyrën Arsimore Vendore Krujë e cila shpjegoi se paratë i ka dërguar në postë ku duhet t'i tërheqin prindërit. Por në fakt në postë paratë i ka tërhequr një tjetër shofer autobusi dhe jo ai që shkon në Murqinë. Ndaj punonjës të postës premtuan për Fiksin se kjo shkelje nuk do të ndodhë më.