Fiks Fare denoncoi mbrëmjen e së premtes sorollatjen e të vesë së një dëshmori, të vrarë në krye të detyrës. Në redaksinë e emisionit investigativ u ankua zonja Prenda Sokoli, e cila është e veja e dëshmorit Lazër Sokoli, i vrarë në krye të detyrës në vitin 1993 në Shkodër. Lazëri ka qenë punonjës policie dhe do të merrte detyrën në Postën te Ura e Mesit në Shkodër. Rrugës për të shkuar në punë, me uniformë policie, rreth orës 23.00 i kanë dalë para disa persona dhe e kanë vrarë dhe masakruar, duke e hedhur në kanal. Lazëri ka qenë vetëm 26 vjeç, ndërsa kishte vetëm 9 muaj që ishte martuar. Denoncuesja, Prenda Sokoli, ka qenë shtatzënë me djalin që tani është 29 vjeç dhe ndodhet jashtë Shqipërisë. Prenda thotë se autorët u kapën në vitin 1993, u mbajtën në burg deri në trazirat e vitit '97 ku dhe u lanë të lirë. Aktualisht thotë nuk janë të arrestuar, bredhin të lirë. Pas ngjarjes, Prenda ka punuar si sanitare dhe në lavanderinë e Policisë së Shkodrës. Ajo thotë se i është drejtuar Fiks Fare për një problem me pensionin që duhet ta marrte në bazë të ligjit. Pohon se ka plotësuar letrat në vitin 2016, kur ka qenë ligji se kryefamiljarët e dëshmorëve dilnin në pension të parakohshëm në moshën 50 vjeçare. Ka plotësuar letrat, ka vijuar pensioni deri në fund të vitit 2019 dhe më pas i është ndërprerë me arsyetimin se është bërë një gabim.