Gazetarët biseduan me banorë të Lezhës, të cilët thanë se në atë vend ishte investuar, por ato investimet vetëm sa "i kishte marrë lumi". "Vetëm vjedhin. Disa pjesa i heqin njerëzit" thonë ata. Ndërkohë, kamera e Fiksit filmoi edhe disa investime, të cilat ishin bërë si donacion në dhjetor të vitit 2021. Sipas një dokumenti, vlera e këtij projekti ishte 38 milionë lekë, nga të cilat 32 ishin donacion dhe vetëm 6 milionë nga Bashkia e Lezhës. Projekti parashikonte ndërtimin e dy urave për këmbësorë me konstruksion metalik dhe dekorativ. Gjithashtu, ndërtimin e dy moleve të vogla për aktivitete sportive ujore dhe riparimi i gardheve mbrojtëse dekorative të ndërtuara përgjatë shëtitores. Pra, deri më tani, për shëtitores, ishin hedhur plot 68 milionë lekë të rinj. Por, a kanë mjaftuar?! Jo, pasi 1 vit pas investimit të fundit dhe 8 vite pas ndërtimit të parë, Bashkia e Lezhës ka hapur një tjetër tender me objekt "Rehabilitimi i Shëtitores dhe Lulishtes mbi lumin Drin”. Bëhet fjalë për të njëjtin vend ku investoi Ministria e Mjedisit dhe u dha donacioni. Nga investimi i parë, në atë të fundit, fondi është trefishuar dhe shuma ka shkuar në plot 94 milionë lekë të rinj. Ose me TVSH, shuma shkon në rreth 1 milionë euro!