Në emisionin Fiks Fare vjen një denoncim sa i çuditshëm aq edhe i dhimbshëm mbi shfrytëzimin e një 13 vjeçareje. Por këtë denoncim nuk e bëjnë prindërit, por vetë drejtori i shkollës ku ajo studion. Ai tregon se një nxënëse vetëm 13 vjeç është larguar nga shtëpia e saj dhe jeton me qira në Sarandë. Vajza është bërë problem pasi vjen gjithmonë me vonesë në shkollë dhe aspak e veshur si moshataret e tjera, apo e veshur për moshën që ka. Drejtori thotë gjithashtu se ka denoncuar në komisiariat bashkë dhe me familjarët e vajzës. Për vajzën e mitur është marrë dy herë vendim që të shkojë në qendër rehabilitimi, por drejtori rrëfen se nuk di çfarë ka ndodhur, pasi vajza jo vetëm nuk është në qendër rehabilitimi, por vjen sërish në shkollë dhe me vonesë. Prindërit invalid të 13 vjeçares treguan se vajza nuk i dëgjon më. Ata jetojnë në kushte të vështira ekonomike pasi kanë vetëm invaliditetin e tyre si burim të ardhurash. Nëna tregon se vajza punoi dy muaj në verë në një market në Ksamil dhe më vonë nuk donte të jetonte më me ta e si rrjedhojë ka dalë vetëm në shtëpi me qira. "Vajza ka tentuar të vetvritet" rrëfen nëna e përlotur,duke ju thënë se "nuk ju kam prindër" për shkak të kushteve të vështira ekonomike."Si ka mundësi që shteti nuk bën asgjë ?" thotë nëna e vajzës.