400 familje në Drenovë të Mallakastrës vuajnë ende në ditët e sotme për pikën e ujit. Edhe pse me nga 2-3 puse në shtëpi asnjëri nuk ka ujë. Fshati edhe pse ka depo uji të cilat furnizojnë edhe disa fshatra të tjerë, nuk ka pasur kurr rrjet të brendshëm për të furnizuar shtëpitë me ujë. Cezmat e fshatit janë të shterura nga koha e nxehtë dhe banorët sytë i kanë nga qielli që të bjerë shi, për të mbushur ujë. Ata njëzëri të revoltuar kërkojnë ujë pasi edhe me këtë pandemi është e papërballueshme situata. Fiks Fare u interesua pranë bashkisë Mallakstër për problemin e furnizimit me ujë të fshatit Drenovë. Drejtori urbanistik pranë kësaj bashkie u shpreh se është në dijeni të situatës, por që e kanë të pamundur për ta furnizuar me ujë me bote pasi fshati nuk ka ujësjellës të brendshëm. Gjithsesi në buxhetin e këtij viti kjo bashki ka bërë të mundur të përfshijë projektin për furnizim me ujë të këtij fshati duke përdorur burimin e Poçemit i cili ndodhet 20 km larg. Ky projekt do të zgjidhte një herë e mirë problemin e mungesës së ujit.