Fiks Fare denoncoi veprimet e disa institucioneve qendrore lokale, të cilat në "bashkëpunim" me njëra tjetrën do të linin në rrugë të madhe një familje me 6 anëtarë në Kuçovë. Në këtë qytet po ndërtohet Parku i Gjelbër, projekt i cili prek disa banesa të hipotekuara. Është miratuar VKM-ja për shpronësimin, por nuk është bërë akordimi i fondeve për këto familje. Megjithatë, Bashkia e Kuçovës i kërkonte kësaj familje që të largohej nga banesa, pa i dhënë fondin e akorduar. Kryefamiljari, Altin Malaj, thotë se nuk është kundra projektit, por në adresë të tij i ka shkuar një shkresë që duhej të largoheshin në datën 6 nëntor. Dokumenti i kishte shkuar me postë në datën 3, dhe për 3 ditë duhej të largohej menjëherë. "Unë jam veti 6 në familje, me të moshuar dhe fëmijë. Ka dalë një listë shpronësimi me vlera përkatëse me emrin tim dhe të gruas, po s'na kanë kaluar asnjë lekë. Sot është data 6 dhe unë duhet të largohem nga banesa" tha ai për kamerën e Fiks Fare. Fiksi dokumentoi një takim mes Altinit dhe Drejtorit të Urbanistikës në Bashkinë Kuçovë. "Shpronësimin nuk e ka kaluar Edi Rama! Ta kalojë Edi Rama dhe ta kalojmë ty" i thotë drejtori. Madje, në bisedë e sipër ai pranon se ka marrë urdhër nga drejtuesit e Bashkisë Kuçovë që banesën e familjes Malaj ta nxjerrin 30 metra mangët. Për këtë fakt, drejtori disponon edhe një e-mail që ia kanë dërguar. "Nuk jam budalla unë, kam këto prova. Më kanë thënë nxirrja 30 metra minus" pohon ai.