Sofia tregon se stacionin e plazhit në Ksamil e ka prej vitesh. Ndërkohë, në vitin 2022 ka aplikuar sërish në Agjencinë e Bregdetit. Por, në të njëjtën sipërfaqe ka aplikuar edhe një person tjetër, Markelian Musai. Sipas vendimit të Agjencisë, subjekti Markelian Musai është s'kualifikuar, pasi s'ka pasur objekt ekzistues, ndërkohë që është kualifikuar Sofia për të ndërtuar. Ka dalë miratimi i strukturës së drunjtë nga KKT-ja, por deri më sot vetëm sa janë konfliktuar. “Megjithëse jam kualifikuar, s’e kam ngritur ende këtë strukturë, pasi nuk na shkon topografi i Bashkisë Sarandë. Kemi marrë privatë, po edhe ata shantazhohen” thotë ajo. Kjo situatë, nga mosveprimi i organeve të drejtësisë apo edhe të pushtetit lokal, ka sjellë përplasje mes saj dhe kundërshtarëve. Qytetarja ka shkuar me dhjetëra herë në Bashkinë e Sarandës, për të marrë zgjidhje, me qëllim që ta lejojnë të ndërtojë atë strukturë të drunjtë. Por, nuk është pritur, madje edhe nga Arieli, i cili tashmë është bërë përgjegjës i Urbanistikës në Bashkinë e Sarandës.