Ai ankohet në emisionin Fiks Fare se gabimi qëndron në datën e lindjes. Shkollën e mesme e ka mbaruar në Gjerbes të Mallakastrës në vitet 1978-1982. Ndërkohë në dëftesën e pjekurisë në atë kohë është bërë gabim ditëlindja e tij. Nga 08.07.1963 është bërë 07.09.1963. Z.Salaj u thotë gazetarëve se me këtë dëftesë ka kryer studimet e larta dhe trajnime të ndryshme, është origjinale, por problemi qëndron tek data. Gjithashtu thotë se nuk e kishte vënë re këtë gabim dhe nuk i kishte kushtuar shumë rëndësi deri në momentin që i doli Llotaria Amerikane . Për këtë gabim ai ju drejtua të gjitha institucioneve arsimore dhe arkivës për të vërtetuar me regjistra dhe numra se pavarësisht ngatërrimit të datës së ditëlindjes në dëftesë bëhet fjalë për të njëjtin person. Por ai merr vesh se faqja e regjistrit që mbante numrin e amzës së tij, faqa 52 dhe 50 figuronin të grisura. Z. Salaj hap proçes gjyqësor në Gjykatën Administrative të Shkallës së Parë Vlorë e cila i jep të drejtë. Nga ana tjetër Zyra Vendore Arsimore Mallakastër dhe Drejtoria Arsimore Rajonale Fier ankimojnë vendimin.