Banorët që jetojnë pranë varrezave të reja të qytetit të Durrësit në lagjen 15 në Spitallë, kanë kërkuar ndihmën e emisionit Fiks Fare pasi çdo ditë e më tepër sipërfaqia e varrezave egzistuese po u afrohet shumë pranë shtëpive. Ata thonë se zgjerimi i varrezave, po iu shkakton probleme, pasi hapësirat për varre po shkojnë deri pranë shtëpive të tyre si dhe prania e varrezave shumë afër lagjes po sjell makth për fëmijët e tyre. Sipas tyre Bashkia duhet të paktën të ndërtojë një mur rrethues. Ata thonë se fillimisht bashkia ju ka premtuar atyre se nuk do të ketë zgjerim të varrezave pa ndërtuar murin rrethues, premtim i cili nuk është mbajtur.Banorët thonë se janë banorë të kësaj lagjeje që prej vitit 90 dhe në kohën kur kanë ndërtuar shtëpitë e tyre varrezat ekzistonin me një distancë prej 200 metrash nga vendet e banimit. Ata thonë se janë të gatshëm të paguajnë edhe vetë për të ndërtuar një mur ndarës me varrezave dhe vendit të banimit.