Qemal Xhaja , mjek përgjegjës për tre ambulanca të tre fshatrave në Bashkinë Kavajë, prej tre vitesh është në 'luftë' me qendrën shëndetësore në Golem, pasi sipas tij ambulancave nuk u jepet mundësia të kenë rrjet interneti. Ai kërkon ndihmën e Fiksit të bëj publike rastin, pasi sipas tij fondet janë dhënë, por me to është bërë abuzim. Që pacientëve të mos u mungojë shërbimi doktor Qemali recetat i mbush nga telefoni i tij personal. Për gjithë këtë situatë ai fajëson drejtoreshën e Qendrës Shëndetësore Golem, e cila nuk pajis me internet këto ambulanca edhe pse sipas mjekut Xhaja Fondi është dhënë. Ndërkohë në përgjigjen e saj drejtoresha Arjana Hylviu thotë se qendra shëndetësore e Zik Xhafaj është pa internet pasi kompanitë që e ofrojnë këtë shërbim nuk kanë interes financiar të mbulojnë zonën me rrjet itnerneti për shkak të numrit të vogël të banorëve të fshatit.Por nga ana tjetër ky institucion nuk ka parashikuar asnjë fond në buxhetin e qendrës shëndetësore të fshatit për shpenzimet e itnernetit që konsumon mjeku.