Fiks Fare vijoi mbrëmjen e së hënës investigimin për "blerjen e pafajësisë" në Prokurorinë e Gjirokastrës. Pas transmetimit të investigimit më 29 tetor 2019, qytetari denoncoi në Prokurorinë e Krimeve të Rënda drejtuesin e akuzës së Gjirokastrës, Julian Çafka dhe kallëzuesin Et'hem Kërpaçin për gjobëvënie. Por, megjithëse u regjistrua procedimi penal, pasi kishte elementë të veprës penale në këtë kallëzim, për çudi dosja u transferua në Prokurorinë e Gjirokastrës. Pra, aktualisht, kjo e fundit, po heton drejtuesin e saj për gjobëvënie. Nëpërmjet dokumenteve dhe bisedave në prokurori, Fiks Fare faktoi se kallëzimi i qytetarit Fiqiri Zhupa po "fle" në këtë organ akuze, pasi deri më tani, qytetari nuk është marrë asnjëherë në pyetje. Më 29 tetor 2019, Fiks Fare dokumentoi se këtij qytetari iu kërkua pagesa e kësaj shume në këmbim të pafajësisë për dy fëmijët e tij, të akuzuar për mashtrim. Kallëzuesi, Et'hem Kërpaçi, në një bisedë me qytetarin i thotë këtij të fundit se "me 50 milionë lekë tërhiqet. Kam folur me Benin (ish-drejtuesi i Prokurorisë së Gjirokastrës) dhe me Julin (drejtuesin aktual të kësaj prokurorie. Janë dakord". Kallëzuesi i thotë se, edhe në këto momente, me këtë shumë pushohet çdo akuzë.