Fiks Fare denoncoi mbrëmjen e së martës problematikat me institucionet financiare bankare, të cilat kanë futur në dokumente kredie edhe persona që nuk kanë mbushur as 18 vjeç. Altin Cungu, nga Kruja, denoncoi në emisionin investigativ se i kanë shkuar disa dokumente nga një institucion bankar. Në këto dokumente, Altini lajmërohet se ka qenë dorëzanës në një kredi të marrë në vitin 2000. "Tani më dërguan disa dokumente, sikur detyrimi im njëherë është 160 mijë lekë të rinj, më pas më ka shkuar 180 mijë lekë të rinj. Unë s'kam marrë ndonjëherë kredi në jetën time, pasi kam qenë emigrant dhe s'kam qenë fare në Shqipëri në atë kohë" thotë ai. Sipas dokumenteve, Altini detyrohet që të paguajë këtë shumë, pasi rezulton dorëzanës në një kredi. Pohon se personi që ka marrë kredinë nuk e njeh, ndërsa ka rezultuar se në letra thuhet se kredia është marrë në muajin prill të vitit 2000 në NOA Bank. Në atë kohë, Altini nuk i kishte mbushur 18 vjeç. Ai ka lindur në 19 shtator 1982, dhe në prill të vitit 2000, ka qenë 17 vjeç! "Nuk e di si janë bërë letrat, këtë kërkoj që të zbulohet i gjithë mashtrimi. Tani unë dal si kreditor i keq në Bankën e Shqipërisë dhe më janë refuzuar të gjithë kreditë" pohon ai. Në një dokumentet që NOA Bank i ka dërguar, ka pasaktësi shumë të mëdha. Vetë NOA Bank shkruan se kredia është marrë në prill të vitit 2000. Më poshtë, jep edhe emrat e dorëzanëve, ku përbri emrit të denoncuesit, ka vendosur edhe datëlindjen e tij, që është shtator 1982! Dhe, në prill 2000, z.Altin Çangu ka qenë vetëm 17 vjeç. Ndërkohë, sipas një dokumenti tjetër, që mban datën 13 prill 2000, është bërë një akt dorëzanie, ku ndër të tjera figuron edhe emri i z.Altin Çangu. Por, në këtë akt nuk është dokumenti i identifikimit të Altinit, por vetëm firma e tij.