Denoncimi në Fiks Fare i aferës të fitimit të tenderit prej 5 milion eurosh nga kompania Hidroterm me pronar Blerim Kuçin, Ministër i Ekonomisë në Kosovë pati jehonë në mediat e Kosovës. Në të njëjtën ditë, në emisionin Debat Plus ai u pyet nga gazetarët për investigimin e Fiksit, por ministri pretendoi se Fiksi nuk është një emision i Kosovës duke mos u përgjigjur kështu në lidhje me investigimin. Madje ai pretendoi se ka për detyrë të sqarojë vetëm mediumet e Kosovës dhe jo ato të Shqipërisë. Ai u pyet nga gazetarët edhe për nenin 1.7 i cituar në Fiks Fare, ku sipas ligjit vajza e tij nuk duhet të ishte administratore e kompanisë, pasi është në konfikt të hapur interesi. Ai tha se është e vërtetë se vajza e tij është administratore, por që nuk e ka realizuar këtë pikë pasi që nuk ka qenë në dijeni. Pas transmetimit në Fiks Fare reagoi edhe partia PDK e cila kërkoi largimin e Ministrit Kuçi nga detyra. Gjithashtu një hetim është nisur edhe nga organet kompetente për këtë çështje. Në emisionin Debat Plus ministri sqaroi se do të rishikonte pozicionin e tij si ministër vetëm nëse në përfundim të hetimeve do të vërtetohej konfikti i interesit.