Prokuroria e Tiranës ka dhënë detaje rreth sulmeve kibernetike të kohëve të fundit në vendin tonë, ku rasti më i fundit ishte rreth një javë më parë ku hakerat iranianë sulmuan sistemin TIMS. Në një dokument zyrtar prokuroria e Tiranës bën me dije se ka nisur një procedim penal për veprat penale ‘përgjimi i paligjshëm i të dhënave kompjuterike’, ndërhyrja në sistemet kompjuterike dhe keqpërdorimi i pajisjeve’. Hetuesit momentalisht i kanë përqendrur hetimet tek hakerimi i Agjencisë Kombëtare të Shoqërisë së Informacionit që përmbledh të gjitha faqet zyrtare qeveritare të gjithë Republikës së Shqipërisë. Në hetim është përfshirë edhe sulmi i datës 9 shtator, ku u hakerua sistemi TIMS, i Ministrisë së brendshme, duke krijuar kaos dhe radhë të gjata në pikat kufitare, në aeroportin Nënë Tereza në Rinas, në portin e Durrësit dhe në të gjitha pikat e kalimit në rrugë tokësore.