Dy persona janë arrestuar, dy janë proceduar në gjendje të lirë dhe një tjetër është shpallur në kërkim, gjatë vijimit të operacionit “Qarku” në Shkodër, ku zbarkuan forcat RENEA dhe ato të FNSH-së. Përmes një deklarate për media policia bën me dije se janë arrestuar shtetasit Petrit Kubazi, 52 vjeç, dhe djali i tij, Gledis Kubazi 20 vjeç. Gjithashtu u procedua penalisht në gjendje të lirë për shkak të moshës dhe djali tjetër i familjes, shtetasi G. K., 16 vjeç. Në banesën e tyre u sekuestruan 3 mina me telekomandë, të lidhura me telefon, 8 kallëpe tritoli C4, gati për përdorim, me peshë totale 1 kilogramë e 600 gramë, kapsolla detonatore të lidhura me tela, 1 armë gjahu (shotgun) me 2 gjerdanë dhe 50 fishekë, 1 radio si ato të Policisë, 1 aparat për bllokimin e valëve, 3 aparate celulare dhe 1 armë sportive.