Ambasada e Shteteve të Bashkuara të Amerikës në Kosovës tha se çdo nismë e qeverisë për rritjen e sigurisë në vend është e mirëpritur, por se nismat duhet të jenë në përputhje me zotimet e Kosovës për paqe dhe stabilitet. Reagimi për Radio Europa e Lirë u dha nga një zëdhënës i Ambasadës pas lajmit se Qeveria e Kosovës po shqyrton mundësinë e themelimit të xhandarmërisë. Ambasada deklaron se po “monitoron idenë e hedhur në publik nga ministri i Brendshëm në detyrë, Xhelal Sveçla. Më 19 maj, ai njoftoi se janë ndërmarrë hapat e parë drejt themelimit të Xhandarmërisë së Kosovës. Ai tha se është nënshkruar dokumenti për krijimin e një grupi punues që do të bëjë analizimin dhe propozimin e modaliteteve për funksionimin e xhandarmërisë. Sipas Sveçlës, kjo forcë do të ketë mision të qartë për ruajtjen e kufijve, integritetit dhe sovranitetit territorial, mbrojtjen nga terrorizmi, menaxhimin e trazirave dhe mbrojen e infrastrukturës kritike.