Një shqiptar është arrestuar nga autoritetet italiane këtë të martë pasi policia zbuloi se në makinën e tij kishte kokainë. Sipas mediave italiane, 30-vjeçari u vu në pranga në Fidenze pasi gjatë kontrollit në makinën e tij janë gjetur dhjetë doza kokaine të gatshme për shitje të vendosura nën frenat e dorës të makinës. I riu tentoi që t’i ikte policisë, për të humbur gjurmët, duke përshpejtuar dhe ikur në rrugë të tjera fqinje por përpjekjet e arratisjes së 30-vjeçarit dështuan. Policia italiane realizoi një përndjekje të vërtetë ndaj shqiptarit, e cila përfundoi pas disa qindra metrash, pranë stacionit hekurudhor. Në makinën e tij u gjetën po ashtu edhe 7 mijë euro, të cilat u cilësuan si të ardhura të përfituara prej veprimtarisë së paligjshme. Policia sekuestroi edhe dhjetë dozat e kokainës të gjetura në automjetin që shqiptari drejtonte. Shqiptari i arrestuar deri më tani nuk rezulton të ketë precedentë penalë, ndërsa ndodhet në qelitë e burgut të Fidenzës në pritje të njohjes me masën e sigurisë ndaj tij.