Seanca konstituive e Kuvendit të Kosovës që ishte parashikuar të mbahej të shtunën në orën 11:00 u shty për në orën 20:00 pas paralajmërimeve për shpërthim potencial të një bombe brenda objektit të institucionit legjislativ të Kosovës. Deputetët dhe mediat prezente u evakuuan nga Policia e Kosovës e cila konfirmoi më pas se lajmi për bombë ishte i rremë. Ministri në detyrë i Punëve të Brendshme, Xhelal Sveçla përmes një postimi në Facebook tha se është identifikuar shpërndarësi i lajmit të rremë dhe sipas tij pistat e hetimit çojnë në Serbi. Sveçla thotë se kërcënimi është i regjistruar në Serbi dhe i përket kompanisë telefonike MTS, ndërsa përdoruesi i numrit është shtetasi serb Lazar Zivkovic, në disa profile të të cilit është parë edhe fotoja e kriminelit të luftës, Ratko Mladic. "Institucionet e Kosovës janë duke trajtuar rastin me prioritet të lartë dhe do të kërkojnë mbështetje ndërkombëtare për arrestimin dhe vënien para përgjegjësisë të personave që qëndrojnë pas kërcënimit, sa më shpejt që të jetë e mundur. Sulmuesit dhe kërcënuesit që strehohen në Serbi, pavarësisht mbështetjes nga shteti serb, nuk do të arrijnë t’i shmangen përgjegjësisë", ka shkruar Sveçla.