Ministria e Brendshme e Turqisë shfuqizoi të dielën masën e izolimit të plotë që ishte vendosur për të parandaluar përhapjen e koronavirusit të ri. Me vendimin e ri, që do të nisë të zbatohet nga e hëna deri më 1 qershor, ministria tha se synon të arrijë një normalizim gradual të situatës. Do të rihapen qendrat tregtare, ndërsa disa biznese do të mbesin të mbyllura, përfshirë palestrat dhe kafenetë. Ndërsa restorantet do të mund të ofrojnë vetëm shërbimin “merr me vete”. Përsa I përket arsimit, procesi mësimor për parashkollorët do të rinisë nëpër shkolla, kurse klasat e larta do të vazhdojnë mësimin në distancë. Turqit mund të kthehen në vendet e tyre të punës, por do të duhet të qëndrojnë në shtëpi nga ora 21:00 deri në 5 të mëngjesit gjatë ditëve të javës, dhe gjithë ditën e shtunë dhe e diel. Nëpunësit civilë do të vazhdojnë të punojnë në distancë ose me turne në zyra. Nga vendimi përjashtohen turistët dhe punëtorët e huaj me leje speciale. Të moshuarit e pavaksinuar mbi 65 vjeç, do të lejohen të dalin nga shtëpitë e tyre vetëm nga ora 10 e mëngjesit deri në orën 2 pasdite, gjatë ditëve të javës. Turqia hoqi disa kufizime në muajin mars, duke bërë që numri i të infektuarve me koronavirusin e ri të rritet. Në muajin prill autoritetet vendosën masën e izolimit të plotë pasi numri i rasteve arriti në mbi 60, 000 në ditë. Të shtunën u raportuan 11.472 raste të reja me koronavirus. Që nga fillimi i pandemisë, Turqia ka shënuar afro 45 mijw vdekje nga COVID-19.