Të enjten, Rusia goditi Kievin me raketa balistike, ndërsa Ukraina lëshoi qindra dronë drejt Moskës; palët ndërluftuese vazhduan serinë e sulmeve, pavarësisht përpjekjeve të fundit të SHBA-së për t'i dhënë fund konfliktit. Presidenti amerikan Donald Trump deklaroi ndërkohë se Elon Musk, drejtuesi i kompanisë SpaceX, ka rikthyer aksesin e Ukrainës në sistemin "Starlink". Kjo ishte një nga çështjet që kishte shkaktuar ftohje të marrëdhënieve mes Uashingtonit dhe Kievit, duke ngritur pikëpyetje mbi mbështetjen e SHBA-së për Ukrainën. Sipas Ukrainës, Rusia lëshoi të paktën 21 raketa balistike në tri valë. Presidenti Volodymyr Zelenskyy bëri të ditur se tre prej tyre mbanin municione thërrmuese që shpërndahen në një zonë të gjerë dhe janë të ndaluara në shumë vende për shkak të rrezikut që paraqesin për civilët. Rusia në anën tjetër njoftoi se, gjatë natës, Ukraina lëshoi 630 dronë në drejtim të Moskës. Palët kryen ndërkohë një shkëmbim të trupave të ushtarëve të vrarë në luftë: Moska dorëzoi 252 trupa, ndërsa Ukraina 25, sipas agjencisë shtetërore të lajmeve "Belta" të Bjellorusisë fqinje. Në të kaluarën, shkëmbime të tilla kanë shoqëruar hapat drejt nisjes së bisedimeve. Presidenti rus Vladimir Putin, në një intervistë për televizionin rus një ditë pas takimit me të dërguarin presidencial amerikan Steve Ëitkoff, konfirmoi se Rusia është e gatshme të rifillojë bisedimet me Ukrainën, me ndërmjetësimin e SHBA-së, muajin e ardhshëm. Putin deklaroi se qëllimi i bisedimeve është garantimi i sigurisë për Ukrainën dhe Rusinë pas zgjidhjes së konfliktit. Ai shtoi se Ëitkoff kishte theksuar nevojën që diskutimet të përfshijnë edhe "arkitekturën e sigurisë evropiane". "Dhe unë jam dakord me këtë. Le të shohim se si do të zhvillohen gjërat në ditët në vijim." Zelenskyy shprehu shpresën se negociatat – të parat që nga muaji shkurt – do të zhvillohen në fillim të nëntorit.