Rumania nisi një operacion shpëtimi të premten, pasi një anije lëshoi një sinjal rreziku. Ky është incidenti më i fundit në një seri ngjarjesh në Detin e Zi, ku dronë, të dyshuar si rusë, kanë goditur disa anije pranë brigjeve të Rumanisë dhe Bullgarisë. Nuk u dha menjëherë ndonjë shkak për situatën e emergjencës, por fundjavën e kaluar avionë luftarakë rumunë rrëzuan dy dronë rusë mbi Detin e Zi. Ndërkohë, NATO njoftoi këtë javë se po dislokon avionë dhe sisteme radari shtesë, si pasojë e sulmeve ndaj anijeve. Anija e mallrave "Khoryv" lëshoi një sinjal rreziku rreth orës 10:00, ndërsa ndodhej 13 milje detare larg portit rumun të Konstancës. Autoritetet rumune bëjnë të ditur se ekuipazhi përbëhej nga 10 shtetas ukrainas dhe tre shtetas azerbajxhanas. "Anijet e shpëtimit kanë arritur të nxjerrin nga uji nëntë persona të gjallë dhe një trup të pajetë," njoftoi Autoriteti Detar Rumun përmes një deklarate për shtyp, duke shtuar se tre anëtarë të ekuipazhit rezultojnë të zhdukur. Sipas faqes së specializuar VesselFinder.com, anija e ngarkesave "Khoryv" është e regjistruar në Komore. Autoriteti detar deklaroi se anija ndodhej "në gjendje rreziku jashtë ujërave territoriale rumune". "Për shkak të kushteve të pafavorshme të motit dhe shikueshmërisë së dobët, një operacion shpëtimi nga ajri me helikopter nuk është i mundur," theksoi autoriteti. Gjatë tre javëve të fundit, dronët kanë goditur anije tregtare në Detin e Zi, pranë brigjeve të Rumanisë dhe Bullgarisë; kjo është një tjetër pasojë e luftës së Rusisë kundër Ukrainës. Më 15 tetor, shtatë anëtarë të ekuipazhit u zhdukën pranë brigjeve të Rumanisë, pasi anija cisternë për transportin e kimikateve "Ëine Trader" mori flakë pas një sulmi me dron. Presidenti Nicusor Dan bëri thirrje që këto sulme "të papranueshme" të marrin fund. Rumania i ka kërkuar NATO-s pajisje shtesë.