Një çift bashkëshortësh i mbijetuan me plagë aksidentit të ndodhur mbrëmjen e së hënës në një ashensor në zonën e Astirit. Policia njoftoi se në një nga pallatet e vendosura në krah të rrugës ‘Aleksandri i Madh’, një ashensor u shkëput nga kati i pestë dhe ra në katin zero, duke plagosur çiftin e bashkëshortëve 56 dhe 55 vjeç. Dy personat e lënduar ndodhen në spital nën kujdesin e mjekëve, ndërsa rasti i tyre rikthen edhe njëherë tjetër në vëmendje problematikën e hershme të sigurisë së ashensorëve në pallatat e ndërtuara në zonat periferike të Tiranës kryesisht pas viteve 2000. Në shtator të 2021, po në Astir mbetën të plagosura dy gra. Në këtë ngjarje, inspektorati Shtetëror i Mbikëqyrjes së Tregut fajësoi administratorin e pallatit dhe “personin përgjegjës” që nuk kanë regjistruar ashensorin e pallatit, ku ndodhi aksidenti. Inspektoriati thotë se ligji detyron një person përgjegjës, por nuk thotë se çfarë detyre ka ky person dhe as jep përgjigje nëse përgjegjësia bie mbi kompaninë që monton ashensorin, apo mbi atë që ndërton pallatin.