Qeveria franceze do të angazhojë edhe ushtrinë për të përballuar valën e re të protestave kundër rritjes së kostos së jetesës, të paralajmëruara për të shtunën. Kryeministri Sébastien Lecornu ka njoftuar një operacion masiv sigurie, pas përplasjeve të dhunshme me policinë, grabitjeve dhe shkatërrimeve që përfshinë Parisin dhe disa qytete të tjera gjatë fundjavës. Ministri i Brendshëm Laurent Nuñez bëri të ditur se ushtarakët e operacionit Sentinelle do të marrin përsipër ruajtjen e objekteve dhe zonave të ndjeshme, për t'u mundësuar policëve dhe xhandarëve të përqendrohen te ruajtja e rendit gjatë demonstratave. Operacioni Sentinelle u krijua në vitin 2015 për mbrojtjen e Francës nga sulmet terroriste dhe përfshin 10 mijë ushtarakë në të gjithë vendin. Autoritetet nuk kanë përcaktuar ende sa prej tyre do të angazhohen në masat shtesë të sigurisë. Qeveria po shqyrton edhe ndalimin e manifestimeve të padeklaruara që paraqesin rrezik për rendin publik. Kufizime mund të vendosen edhe për protesta të autorizuara, nëse organizatorët nuk japin garanci të mjaftueshme për shmangien e dhunës. Ndërkohë, në pjesë të Parisit dhe Lionit janë vendosur orare ndalimi të qarkullimit gjatë natës. Autoritetet thonë se masat synojnë parandalimin e përplasjeve të reja, ndërsa vendi përballet me pakënaqësi në rritje për çmimet e larta, pagat dhe gjendjen e shërbimeve publike. Qeveria ka premtuar ndërhyrje më të shpejta ndaj grupeve të dhunshme, ndërsa protesta të tjera priten në një klimë tensionesh politike dhe sociale, vetëm disa muaj përpara zgjedhjeve presidenciale në Francë.