Produktiviteti i Shqiptarëve në punë, në periudhën kohore nga 2010 deri në 2019 është rritur. Sipas raportit të publikuar nga Organizata Ndërkombëtare e Punës, produktiviteti i punonjësve është rritur me 2.7 për qind. Ky tregues përkthehet në fitime më të larta për bizneset dhe punëdhënësit shqiptarë, kjo si pasojë e punës dhe kontributit më të lartë që marrin. Megjithëse përfitojnë më shumë nga puna e punonjësve rritja e pagave është e një niveli të ulët. Referuar këtij raporti, paga minimale është rritur më pak sesa produktiviteti në punë. Me një shkallë rritjeje prej 1.7 për qind, duket se kontributi i rritjes së pagave është i ulët në rritjen e konsumit dhe për pasojë edhe atë ekonomike në vend. Raporti global i pagave, i formuluar nga Organizata Ndërkombëtare Punës (ILO) vlerëson se në shumicën e vendeve të Europës dhe Azisë Qendrore pagat ishin rritur më shumë se produktiviteti i punës, ndërsa në disa vende të tjera, më të pakta në numër, ku bën pjesë edhe vendi ynë, kishte një sjellje të kundërt. Rritjen më të madhe të pagave minimale e ka bërë Uzbekistani me 18% gjatë periudhës në studim, në një kohë që produktiviteti i punës është rritur me 4.8%. Gjithashtu në Rumani pagat minimale u rritën me 12.3% gjatë periudhës 2010-2019, ndërsa produktiviteti i punës me 2.3%. Raporte të ngjashme ndërmjet ecurisë së pagës minimale dhe produktivitetit të punës patën edhe vende të tjera të Europës Lindore si, Bullgaria, Maqedonia, Sllovakia, Hungaria, Bjellorusia, Ukraina, Rusia, Estonia, etj.