Shqipëria është vendi me numrin më të ulët të mjekëve në raport me popullsinë. Raporti më i fundit i Organizatës Botërore të Shëndetësisë specifikon se vendi ynë ka numrin më të ulët të mjekëve për 10 mijë banorë, edhe për vitin 2019. Sipas statistikave të publikuara nga Instituti i Statistikave për regjistrimet në arsim, mjekësia është ndër degët më të preferuara nga studentët shqiptarë. Nga grafiku i regjistrimeve në arsim të lartë degët e shëndetit dhe mirëqënies reflektojnë rritje me 4.9 përqind dhe janë ndër të vetmet degë që kanë pasur rritje të regjistrimeve të studentëve. Pra pavarësisht se numri i të diplomuarve është rritur, përfshirja e tyre në tregun e punës paraqitet i ulët. Kjo reflekton lëvizjen e personelit mjekësor jashtë kufijve, ku destinacioni më i preferuar mbetet Gjermania edhe për shkak të politikave të këtij shteti për emigrantët me një profesion. Shpenzimet publike të Shqipërisë për sektorin e shëndetësisë janë më të ulta sesa shumica e vendeve të Europës Juglindore, duke arritur një shifër prej 2.97 për qind në raport me Produktin e Brendshëm Bruto dhe projeksionet e OKB tregojnë se në vitet 2020 deri në 2022 kjo shifër do të vijë në ulje. Qeveritë në 30 vitet e fundit, i kanë dedikuar një përqindje të ulët të buxhetit të shtetit, shëndetësisë me përjashtim të këtij viti, ku ka pasur një vendim të qeverisë për rritjen e rrogave të mjekëve dhe bonusit për përballimin e pandemisë.