Prokuroria e Shkodrës ka shpallur mos kompetencë për ‘Masakrën e Dobraçit’ dhe ka kaluar dosjen për hetim në SPAK. Prokuroria e Shkodrës ka dyshime se ngjarja është kryer nga një grup kriminal, veper penale që është kompetencë e SPAK. Sapo dosja të administrohet në protokoll, pritet të hidhet shorti prej nga ku do të caktohet grupi hetimor i posaçëm. Atentati në zonën e Dobraçit në Shkodër më 30 tetor, shënoi 4 viktima, mes tyre dhe dy kalimtarë të rastit, ciftin Bashkim dhe Flutura Basha. Shënjestra e atentatit ishte Hamza Lici, i cili ndërroi jetë në vendngjarje. Sipas hetimeve, autorët qëlluan nga një makinë në lëvizje, drejt Hamza Licit dhe Arlind Bushatit që ishin në të njëjtën makinë. Bushati luftoi për jetën në spital për disa orë pasi mori një plumb në kokë dhe ndërroi jetë më vonë. Lici dhe Bushati po udhëtonin nga Shkodra drejt Koplikut me makinën tip Benz me targa kroate, në momentin që drejt tyre u hap zjarr. Viktima Hamza Lici është vëllai i Ibraim Licit, i kërkuar për vrasje. Në makinën e tyre u gjetën tre pistoleta. Dy viktimat e rastit, Bashkim dhe Flutura Basha po udhëtonin më motor në momentin e atentatit, kur mjeti tip Benz me të cilin po udhëtonte Lici dhe Bushati ka humbur kontrollin dhe i ka përplasur. Për shkak të plagëve të rënda Flutura Basha ndërroi jetë në vend, ndërsa Bashkim Basha disa ditë më vonë në spital. 10 min pas ngjarjes, një makinë tip Land Rover model i ri i djegur u gjet në fshatin Grudë e re të Shkodrës, ku brenda saj u gjetën dy automatikë, të dyshuar se u përdorën në atentat.