Zyrtarët e policisë në Kolumbus të Ohajos, kanë publikuar pamjet në të cilat shihet oficeri që qëllon për vdekje adoleshenten me ngjyrë që sulmoi dy femra me thikë. “Ne nuk kemi ende të gjitha faktet por ne dihmë që një 16 vjecare, një fëmijë i këtij komuniteti, u nda nga jeta në mënyrë tragjike”, tha kryebashkiaku Andreiu Ginther. “Pyetja më e rëndësishme është; a duhej ajo të vdiste?” shtoi ai. “Si arritëm deri këtu. A është ky një dështim i komunitetit tonë. Dikush mund të jetë fajtor por të gjithë ne jemi përgjegjës”. Një hetim ka nisur tani për të përcaktuar nëse oficeri i përfshirë në rast ka gabuar apo jo. Policia e identifikoi oficerin që qëlloi si Nikolas Reardon, që u punësua në dhjetor 2019. Oficeri është pezulluar përkohësisht nga shërbimi në terren në pritje të hetimit. Vrasja tragjike vjen në një kohë kur përdorimi i forcës nga policia në të gjithë vendin është nën polemika. Në shkurt, ish oficeri i policisë në Kolumbus, Adam Coy, u padit për vrasjen e Andre Hill, një 47 vjecari afro amerikan. Të mërkurën vonë, një turmë demonstruesish, përfshirë studentët e universitetit shtetëror të Ohajos, marshuan në qendër të qytetit duke thirrur Jeta e njerëzve me ngjyrë ka rëndësi dhe mbani dorën. Mos qëlloni.