Presidenti serb Aleksander Vuçiç deklaroi se ka tre mundësi për zgjidhjen e çështjes së Industrisë së Naftës të Serbisë (NIS), e cila ndodhet nën sanksione të SHBA-së për shkak të pronësisë ruse. Mundësia e parë sipas presidentit serb është që amerikanët t’i japin një licencë NIS-it ose t’i heqin sanksionet kundër kompanive ruse. E dyta, është që rusët të shesin aksionet e tyre një kompanie tjetër, dhe mundësia e tretë është që shteti serb duhet të veprojë vetë për rastin. Sipas Vuçiç, çështja e NIS-it duhet të zgjidhet brenda një afati prej 37 ditësh, apo deri më 15 janar. Ai theksoi se të gjithë duhet ta kuptojnë se nuk ka zgjatje të afatit dhe se furnizimi me karburant për qytetarët dhe ekonominë e Serbisë nuk duhet të rrezikohet. Presidenti deklaroi se Serbia përballet gjithashtu me rrezikun e sanksioneve dytësore kundër Bankës Kombëtare të Serbisë dhe bankave tregtare, dhe se vlerësimi i investimeve të Serbisë është në rrezik për shkak të gjendjes në NIS.