Kur Mithat Frashëri, Gjergj Fishta, Ndre Mjeda e të tjerët hodhën themelet e standardizimit të alfabetit të gjuhës shqipe në Kongresin e Manastirit në nëntor të vitit 1908 vështirë se kanë parashikuar sfidat e shqipes një shekull më vonë. Gjuha shqipe përballet sot me sfidat e epokës digjitale, të cilat lidhen me zhvillimin, ruajtjen dhe promovimin e saj në një botë të teknologjisë së avancuar dhe komunikimit global. Disa nga këto sfida përfshijnë, mungesa e përfaqësimit në teknologji. Numri i folësve të shqipes nuk josh kompanitë gjigante të prodhimit të aplikacioneve, pajisjeve inteligjente dhe sistemeve të menaxhimit të informacionet për ta përfshirë atë në softuerët e tyre. Përkthimi i softuerëve, aplikacioneve dhe faqeve të internetit shpesh është i mangët, i pasaktë, ose mungon fare. Mungon një standardizim i terminologjisë teknike në shqip, duke çuar në përdorimin e termave të huazuar nga gjuhë të tjera, sidomos nga anglishtja. Ndërkohë, sa i takon inteligjencës artificiale, shqipja mungon plotësisht.