Deputeti shqiptar në Parlamentin e Serbisë, Shaip Kamberi, se bashku me dy deputetë të tjerë kanë propozuar rezolutë për dënimin e krimeve të kryera nga Serbia në Kosovë gjatë viteve 1998-1999. Njoftimi për rezolutën është bërë nga deputeti Kamberi përmes një postimi në rrjete sociale. Ai sqaron se rezoluta dënon krimet sistematike, vrasjet, deportimet, spastrimin etnik dhe dhunën e ushtruar ndaj popullsisë civile shqiptare në Kosovë nga strukturat ushtarake, policore dhe paramilitare të regjimit të atëhershëm të Serbisë. Sipas Kamberit, nisma rikujton masakrat në Reçak, Mejë, Krushë të Madhe, Krushë të Vogël, Suharekë, Izbicë, Podujevë dhe shumë vende të tjera, si dhe ekzistimin e varrezave masive në Batajnicë dhe vendodhje të tjera.