Pas “Mig”-ëve rusë dhe “Rafale”-ve franceze, Serbia po kthehet te dronët dhe sistemet kineze kundërajrore PVO, duke importuar nga Kina vetëm gjatë dy viteve të fundit mallra me vlerë rreth 240 milionë euro. Sipas REL, nga të dhënat e Institutit Ndërkombëtar për Kërkime mbi Paqen (SIPRI) në Stokholm, nga viti 2020 deri më 2024, Serbia ka importuar pjesën më të madhe të armëve nga Kina 57%, më pas nga Rusia 20% dhe Franca 7.4%. Ndërsa gjatë vitit 2024 nuk është raportuar për blerje të armatimit nga Kina. Sipas hulumtueses, Katarina Gjokiqit në SIPRI, nuk ka të dhëna të besueshme, sepse Serbia nuk e ka publikuar kurrë zyrtarisht numrin e sistemeve të armatimit dhe të pajisjeve ushtarake që i kanë mbërritur nga Kina. Serbia është vend kandidat për anëtarësim në Bashkimin Evropian dhe është deklaruar neutrale ushtarakisht. Ajo është bërë vendi i parë evropian që ka blerë dronët kinezë CH-92 dhe CH-95, si dhe sistemet PVO FK-3 dhe HQ-17. Droni CH-92 përdoret për mbledhjen e të dhënave inteligjente, mbikëqyrje dhe sulme të sakta ndaj objektivave tokësore. NË vitin 2019, sipas vlerësimeve të SIPRI-t, Serbia ka porositur tri sisteme PVO HQ-22 me 300 raketa, të cilat janë dorëzuar gjatë viteve 2022 dhe 2023. Varianti për eksport i këtij sistemi, i njohur si FK-3, ka një distancë mesatare veprimi prej 100 kilometrash dhe i është prezantuar publikut në prill të vitit 2022, në aeroportin ushtarak Batajnica, pranë Beogradit.