4 kryetarët e rinj nga Lista Serbe, të dalë nga zgjedhjet lokale në Kosovë, janë betuar këtë të premte, në katër komunat në veri të Kosovës, Mitrovicë e Veriut, Leposaviq, Zveçan dhe Zubin Potok. Betimi I tyre nuk ka kaluar pa debate. Kryetari i sapozgjedhur i komunës së Mitrovicës së Veriut, Milan Radojević, premtoi se do të sjellë ndryshime dhe se ‘periudha e errët ka mbaruar’. Komunat në veri me shumicë serbe janë udhëhequr nga kryetarë shqiptarë që nga maji i viti 2023, pasi ata nga Lista Serbe kishin dhënë dorëheqjen në nëntor të vitit 2022 nga institucionet, në shenjë kundërshtimi me vendimet e Qeverisë së Kosovës. Kryetari i Listës Serbe, Zllatan Ellek, deklaroi pak ditë më parë se kryetarët e rinj të komunave, pas marrjes së detyrës do të kërkojnë të kenë qasje në dokumentacionin e plotë. Lista Serbe, ka njoftuar gjithashtu se do të anulonte vendimet “jolegjitime” që kanë marrë kryetarët shqiptarë të komunave në veri.