Finalizohet operacioni antidrogë i koduar “Lugina”. Policia e Tiranës në bashkëpunim me Policinë Kufitare të Kapshticës, goditën aktivitetin kriminal të trafikimit të lëndëve narkotike. Burimet zyrtare bëjnë me dije se janë arrestuar 4 shtetas të cilët tentuan të trafikonin lëndë narkotike nëpërmjet kufirit të gjelbër me Greqinë. Këta shtetas, në momentin që janë konstatuar nga shërbimet e Policisë Kufitare të Kapshticëa dhe ato të Frontex-it, në vendin e quajtur "Lugina e Refugjatëve”, kanë hedhur në tokë 2 çanta shpine, brenda të cilave kishte një sasi prej 10 kg lëndë të dyshuar kanabis, të cilën këta shtetas po tentonin ta trafikonin në drejtim të Greqisë. Gjithashtu, gjatë kontrollit në banesën e njërit prej të arrestuarve, u gjetën dhe u sekuestruan një krehër pistolete, fara kanabisi, fidanë të dyshuar kanabis të kultivuar në gota, si dhe mjete të ndryshme që shërbenin për kultivimin e bimëve narkotike. Finalizimi i këtij operacioni policor bëri të mundur sekuestrimin e 10 kg lëndë e dyshuar narkotike kanabis, fara kanabisi, mjete që shërbenin për kultivimin e bimëve narkotike dhe sende të tjera të kundërligjshme.