Partia Demokratike bojkotoi mbledhjen e Konferencës së Kryetarëve, ku ministri i Financave, Petrit Malaj prezantoi projetligjin për buxhetin e shtetit për vitin e ardhshëm dhe paketën fiskale shoqëruese të tij. Përmes një njoftimi të grupit parlamentar, PD thotë se deputetëve të saj nuk u është vënë në dispozicion asnjë dokument për projektbuxhetin. “As projektligjet, as relacionet shpjeguese, as dokumentacioni financiar që duhet të shoqërojë një nismë të kësaj rëndësie. Pra, deputetët e Kuvendit të Shqipërisë thirren të dëgjojnë ministrin e Financave të flasë për një dokument që nuk kanë pasur mundësi ta lexojnë, ta studiojnë apo ta analizojnë dhe kjo nuk është mënyra se si duhet të funksionojë Parlamenti i një vendi demokratik”, thotë grupi parlamentar i PD. Sipas opozitës mbledhja është antikushtetuese, shkel rregulloren e Kuvendit dhe e shndërron këtë institucion në një sallë konferencash për qeverinë, ku deputetët janë publik i ftuar për prezantimet e ministrave.