GJKKO ka kthyer mbrapsht në SPAK dosjen për Edvin Priftin, duke i dhënë dhe dy muaj kohë prokurorisë të plotësojë hetimet për mjekun. Gjatë seancës së kësaj të marte, gjyqtarja Elsa Ulliri i kërkoi prokurorit Sotir Kllapi të rikryejë aktin e ekspertimit financiar. Në muajin shkurt të një viti më parë, SPAK mbylli hetimet dhe bëri kërkesë në GJKKO për kalimin e dosjes për gjykim ndaj Edvin Priftit, për të cilin janë ngritur katër akuza, “korrupsion pasiv” në 7 raste, “vjedhja e kryer duke shpërdoruar detyrën”, “Fshehja e të ardhurave” dhe “pastrim parash”. SPAK zhvilloi për rreth 4 vite hetime për ish shefin e Shërbimit të Kardiokirurgjisë pranë Qendrës Spitalore Universitare “Nënë Tereza”. Duke u bazuar tek hetimet e SPAK, Prifti mori para për 7 ndërhyrje pranë QSUT, teksa atij iu sekuestruan disa shuma parash të cilat iu gjetën cash në zyrë dhe banesë.