Top News - Reshjet e shiut, probleme nga jugu në veri/ Vështirësi në disa rrugë dhe mungesë energjie Reshjet e dendura të shiut që kanë mbërthyer vendin prej më shumë se 24 orë kanë fryrë lumenjtë dhe situata paraqitet problematike në disa zona. Lumi Ishëm ka dalë nga shtrati në pjesën fundore të tij, duke përmbytur tokat në disa fshatra të Krujës, kryesisht në fshatin Bubq. Po në qarkun e Durrësit, Lumi Erzen në pjesën e fshatit Hardhishtë, ka dalë nga shtrati si pasojë e prurjeve me intensitet gjatë natës, por nuk ka rrezik për banesa. Shkumbini është në nivelet maksimale në zonën e Çermës në Lushnje. Prurjet e lumit janë fryrë ndjeshëm në orët e fundit, ndërsa deputeti socialist i zonës, Erion Braçe u kërkoi banorëve që të tregohen të kujdesshëm. Sipas Braçes, situata përkeqësohet për shkak të shpyllëzimit në zonën e Librazhdit. Në Gjirokastër dhe Sarandë, disa akse dytësore kanë shembje të shpateve dhe rrëzime pemësh. Në Finiq ka pasur bllokime të aksit Zminec-Gravë ku është punuar gjatë natës për ta zhbllokuar. Në Delvinë ura e shembur e Vanës e bën të pamundur qarkullimin aktualisht për këmbësorët. Dropulli, Cepo dhe fshatra të bashkive Sarandë, Përmet, Delvinë , Libohovë dhe Finiq kanë probleme të furnizimit me energji elektrike. Në Lazarat ka probleme me daljen e ujërave të përroit kryesor ndërsa gjatë natës është përfshirë nga flakët kabina elektrike e zonës dhe aktualisht banorët janë pa energji. Në Vlorë, Lundrimi detar vijon të jetë i pezulluar për shkak të erës me shpejtësi deri në 25 metër /sek dhe deti me fuqi dallge deri në 8 ballë. Në zonën e Lumit të Vlorës ,në afërsi të fshatit Brataj janë regjistruar rrëshqitje gurësh.Po kështu gjithë zona nga Orikumi,Dukat ,Llogora e deri në Himarë ka pasur shkëputje të energjisë elektrike,për shkak të erërave të fuqishme. Në qarkun e Elbasanit, një biznes te ura e Shkumbinit dhe një banesë në fshatin Mjekës rrezikonin përmbytjen, por janë shpëtuar nga ndërhyrja e autoriteteve. Gjatë natës ka pasur prani inertesh ne aksin Elbasan-Q.Thane, Elbasan-Gjinar, Gramsh-Moglice te cilat jane pastruar nga firmat kontraktuese. Ne furnizimin me energji elektrike ka pasur disa nderprerje ne Nj.A Rrajce, Nj.A Sterbleve, Nj.A Mollas, Nj.A Shushice. Ne terren jane punonjesit e OSHE te cilet po punojne per riparimin e defekteve.