Protesta e thirrur në orën 18:00 nga Opozita ka vënë në gatishmëri Policinë e Shtetit. Mbi 1500 forca të policisë, duke nisur nga ato të rendit, FNSH, Shqiponjat do të jenë në terren për mbarëvajtjen e protestës. Në gatishmëri do të jenë edhe forcat RENEA dhe Garda e Republikës për të kryer detyrën në ruajtjen e institucioneve. Sipas burimeve, të gjithë efektivët do të jenë të pajisur me maska kundragaz, dhe në terren do të jenë edhe 5 autobotë me ujë nëse do të ketë nevojë në raste incidentesh. Si në çdo protestë do të krijohet kordoni me efektivë policie para kryeministrisë dhe perimetrit rreth saj. Në terren do të përfshihen edhe agjentët civilë, për të monitoruar mbarëvajtjen e protestës. Kryeministria ka blinduar dyert me veshje metalike, ndërsa përgjatë gjithë bulevardit ‘Dëshmorët e Kombit’ Policia ka instaluar kamera me rezolucion të lartë. Policia e Tiranës u thirr për takim mbrëmjen e djeshme nga drejtori i përgjithshëm për protestën. Në mbledhje ishin të gjithë shefat e komisariateve të Tiranës.