Deklaratat e fundit të kryeministrit të Kosovës, Albin Kurti, për bashkimin me Shqipërinë, kanë ngjallur një sërë reagimesh në të dyja anët e kufirit. Duke folur në një intervistë për portalin “Monocle”, kreu i qeverisë së Kosovës tha se nëse do të prezantohej një referendum, do të votonte pro bashkimit kombëtar. “Kosova dhe Shqipëria janë dy shtete por një komb, ne nuk e shpallem pavarësinë kundër Shqipërisë, por kundër Serbisë”, ka thënë Kurti. Për analistët politikë në Kosovë, rikthimi i tezës së bashkimit Shqipëri-Kosovë, e cila është në fakt edhe një nga shtyllat mbi të cilat është ngritur Vetëvendosja, është një përpjekje e Kurtit për të rritur besimin e qytetarëve pas humbjes katastrofike në zgjedhjet lokale. Për ekspertin Valon Syla, Kurti nuk arriti ta bashkojë PSD-në me Vetëvendosjen dhe jo më të bashkojë Shqipërinë me Kosovën.