Në Dhomat e Specializuara të Kosovës (DhSK) në Hagë ka vijuar dëshminë dëshmitarja e mbrojtjes së Hashim Thaçit, ekspertja Helen Fraser në gjykimin në të cilin Thaçi akuzohet së bashku me Bashkim Smakajn, Isni Kilajn, Fadil Fazliun dhe Hajredin Kuçin për vepra penale kundër administrimit të drejtësisë. Ekspertja e linguistikës forenzike, Helen Fraser, ka dëshmuar se ka marrë një përqindje të vogël prej 3 % nga mbrojtja e Hashim Thaçit për analizim, e që pastaj janë përfshirë në raportin e saj lidhur me interpretimin e tingujve. Ajo ka pohuar në dëshmi se nuk di asgjë për 97 % të provave të tjera. Ekspertja ka mohuar te këtë pyetur mbrojtjen e Thaçit që t’i japë më shumë dosje të audiove për t’i përfshirë në raportin e saj dhe se me avokatin ka komunikuar përmes zoom dhe e-mailit. Fraser tha se disa interpretime që u janë bërë tingujve në transkriptat e Prokurorisë shkojnë përtej asaj që është objektivisht e transkriptueshme.