Kthimi i stinës së dimrit në fillimprilli është shoqëruar me reshje dëbore në juglindje dhe në zonën e Llogorasë. Reshjet e dëborës kanë shkaktuar probleme në qarkullimin e automjeteve. Qarku i Korçës është mbuluar nga dëbora gjatë natës së kaluar dhe vijojnë të bien me intensitet të ulët. Trashësia varion nga 5 cm në zonat fushore deri 15 cm në pjesët malore si në rrugën e Dardhës. Në akset rrugore po punohet me mjete borëpastruese për mirëmbajtje dimërore, pastrime e kriposje. Në rrugë nuk ka pasur probleme, ndërkohë që në disa fshatra ka pasur mungesë të energjisë elektrike. Ndërkohë, këtë mëngjes janë krijuar ngrica dhe për këtë arsye qarkullimi në rrugë bëhet me zinxhir në qafën e Llogorasë. Në afërsi të Pishës Flamur janë krijuar radhë të gjata të automjeteve në rrugë. Policia rrugore nuk lejon makinat të qarkullojnë pa zinxhir, ndërkohë që borëpastrueset po punojnë për hapjen e aksit duke hedhur kripë. Shoferët që kanë përdorur këtë rrugë janë kapur të papërgatitur nga reshjet e dëborës. Për pasojë e mungesës së zinxhirëve dhe gomave të dimrit disa makina kanë ngecur dhe për pasojë rruga është bllokuar.