Që prej janarit të këtij viti e deri më tani policia ka grumbulluar jo pak, por plot 250 milionë lekë të reja që u janë vendosur qytetarëve apo bizneseve të ndryshme për mosrespektim të masave anticovid. Dhe kjo kryesisht për mosmbajtje të maskës, apo të atyre lokaleve që kanë zhvilluar festa të ndryshme, apo që kanë funksionuar pas orës 22.00. Gjithashtu ka pasur gjoba edhe për grumbullime me më shumë se 10 persona, edhe pse muajin e fundit, kur nisi zyrtarisht fushata ka pasur një lehtësim në numrin e personave, por brenda kriterit të distancës. Gjithsesi, që prej vendimit për mbajtjen e maskës e deri më sot ka pasur një numër të madh të gjobave që u janë vendosur qytetarëve. Dhe ndryshe nga më parë kur gjoba vendosej nga Policia dhe kishte një hapësirë për të mos i paguar, tashmë cdo gjobë prej 3 mijë lekësh të reja faturohet te fatura e energjisë elektrike, cka nënkupton pagesë të detyruar sa herë që qytetari bën pagesën e energjisë. Kësisoj, me një përllogaritje të thjeshtë mund të thuhet se arka e shtetit është mbushur mjaftushëm me të ardhura, që janë siguruar nga ky akti normativ për mbajtjen me detyrim të maskës sapo del nga shtëpia. Gjoba u vendosën nga Policia e shtetit dhe ajo bashkiake, edhe gjatë periudhës së izolimit në fazën e parë të pandemisë, por ato u falën pas një vendimi të vetë qeverisë. Ndërsa në këtë rast, cështja duket më e komplikuar, sepse gjoba përfshihet në faturën e energjisë cka nënkupton pagesë të detyruar.