Amnesty International, Organizata ndërkombëtare për të drejta të njeriut ka deklaruar se viti 2020 ka patur numrin më të ulët të dënimeve me vdekje në dekadën e fundit, pavarësisht se sfidat e krijuara nga pandemia nuk i kanë ndalur 18 shtete për të marrë vendimet me vdekje. Të paktën 483 persona janë ekzekutuar globalisht, çka bën që numri të jetë 26 % më i ulët në krahasim me vitin 2019, është thënë në raportin vjetor të organizatës me bazë në Londër. Në këto të dhëna nuk përfshihen shtetet që klasifikojnë dënimet me vdekje si sekrete shtetërore, apo ato që ofrojnë informacion të kufizuar. Në mesin e këtyre shteteve hyjnë: Kina, Koreja Veriore, Siria dhe Vietnami. Ndërsa Irani, Egjipti, Iraku dhe Arabia Saudite është thënë se janë përgjegjëse për 88 për qind të të gjitha ekzekutimeve. “Teksa bota fokusohet në gjetjen e rrugëve për të ruajtur jetët nga COVID-19, disa qeveri kanë treguar vendosmëri shqetësuese për të ekzekutuar njerëzit, pavarësisht rrethanave tjera”, ka thënë Sekretarja e Përgjitshme e Amnesty International Agnes Callamard. Kina besohet se ekzekuton mijëra persona brenda vitit, duke e bërë atë vrasësin më të madh në botë, ka thënë kjo organizatë në raportin e titulluar Dënimet me vdekje dhe ekzekutimet e 2020.