Ish drejtori i antiterrorit Gledis Nano, ishte pika kyçe ku kalonin informacionet e klasifikuara për konfliktin mes qeverisë iraniane dhe muxhahedinëve të strehuar në Manzë. Në email-et e bëra publike nga hakerat iranianë, bien në sy një sërë shkresash zyrtare për agjentë të infiltruar në Shqipëri, të shërbimit sekret Iranian, komunikime për gjyqin e muxhahedinëve dhe paralajmërime për fuqinë e armëve bërthamore të Iranit. Për dy agjentë të inteligjencës së regjimit Iranian, Ehsan Bidi dhe Daniel Kasraei, autoritetet shqiptare kanë këmbyer vazhdimisht informacione me antiterrorin italian për identifikimin dhe gjurmimin e lëvizjeve të tyre. Ehsan Bidi erdhi në Shqipëri si pjesë e grupit të Muxhahedinëve. Identifikimi i tij u bë i mundur në 17 tetor të vitit 2020, kur përmes një komunikimi zyrtar ministria e brendshme, udhëroi dëbimin e tij nga vendi. Në 11 shkurt të vitit të kaluar, autoritetet shqiptare, nëpërmjet një shkrese zyrtare, kërkonin bashkëpunimin e antiterrorit italian për të zbuluar fijet që e lidhnin Bidin me Daniel Kasraei. Ky i fundit, duke u shtirur si gazetar, shërbente për shërbimet sekrete iraniane.