Pas dështimit të 54 seancave të Kuvendit të Kosovës për konstituim dhe zgjedhje të kryetarit të tij, tashmë Gjykata Kushtetuese ka lëshuar një tjetër ultimatum. Pas përfundimit të ultimatumit të parë për konstituimin e Kuvendit brenda 30 ditësh, dhe pezullimit të çdo vendimi e veprimi deri në 8 gusht, tashmë ligjvënësit kosovarë do të kenë 30 ditë të tjera për konstituimin e Kuvendit të Kosovës dhe zgjedhjen e kryetarit. Nga kjo e mërkurë do të nisë mbajtja e seancave plenare për konstituimin e Kuvendit dhe zgjedhjen e kryetarit. Sipas aktgjykimit të Kushtetueses, një kandidat ka të drejtë të votohet deri në 3 herë, me votim të hapur, vendim ky i kritikuar nga partia më e madhe e dalë nga zgjedhjet e 9 shkurtit në Kosovës, Lëvizja Vetëvendosje. Nga ana tjetër, vendimi është mirëpritur nga partitë opozitare, të cilat nuk pranuan ngritjen e komisionit për zgjedhjen me votim të fshehtë të kryeparlamentarit.