Zv/kryeministri dhe ministri I Jashtëm I Kosovës, Glauk Konjufca ka deklaruar se negociatat për zgjedhjen e Presidentit po vijojnë por që zgjidhja, sipas tij, do të varet nga vullneti i opozitës. Konjufca është shprehur se kryeministri Kurti ka takuar kreun e LDK-së dhe se një ftesë ia ka dërguar edhe PDK-së. Sipas tij, ka përpjekje për të shkuar në një marrëveshje. Ministri I Jashtëm ka deklaruar se Vetëvendosja nuk insiston patjetër që të ketë emrin e saj në zgjedhjen e Presidentit. ‘Mirë është të na e thonë se çfarë kërkojnë’, tha Konjufca për partitë opozitare. Sakaq, LDK, përmes deputetit Armend Zemaj, ka deklaruar se mungesa e vullnetit nga Lëvizja Vetëvendosje po e vështirëson zgjedhjen e presidentit, duke paralajmëruar se vendi mund të shkojë drejt zgjedhjeve, nëse nuk arrihet konsensus. Deputeti tha se LDK nuk përkrah kandidatët partiakë dhe se një gjë e tillë i sjell Kosovës sistem të padëshirueshëm. Kosova ka hyrë në 15 ditët vendimtare për zgjedhjen e Presidentit, sipas afatit të caktuar nga Gjykata Kushtetuese. Nëse përgjatë këtyre dy javëve nuk arrihet marrëveshje mes partive, Kosova do të shkojë sërish në zgjedhje.