Pasi ushtroi të drejtën për të votuar në Prishtinë, kryeministri në detyrë Albin Kurti u nis në Mitrovicë të Jugut për të zhvilluar një takim. Sipas informacioneve, Kurti kishte planifikuar një ndalesë në një lokal, në të cilin ka patur mbështetës të PDK-së e po ashtu edhe të LVV-së. Në momentin që truproja e kryeministrit ka shkuar në lokalin në lagjen Tavnik, sipas pronarit ka pasur tensione dhe i njëjti ka mbyllur lokalin duke i nxjerrë klientët jashtë. "Për shkak të telasheve të vazhdueshme nga të dy palët, kemi vendosur ta mbyllim lokalin, pasi është rrezikuar siguria e qytetarëve dhe e imja personale. Provokimet do t’i lëmë anash, sepse siguria është prioritet. Besoj që secili duhet të jetë, qoftë për një moment, nën lëkurën time vetëm atëherë do ta kuptonte çfarë po kaloj", tha pronari i lokalit Arizon Haziri.