Deputetët e Komisionit për Punë të Jashtme dhe Diasporë në Kosovë i kanë kërkuar Gjermanisë dhe bashkësisë ndërkombëtare të ushtrojnë presion ndaj Serbisë, në mënyrë që përgjegjësit për sulmin terrorist në Banjskë të dalin para drejtësisë. Kërkesa iu bë ambasadorit gjerman në Kosovë, gjatë një takimi ku u diskutua për zhvillimet në vend dhe bashkëpunimin mes dy shteteve. Pas mbledhjes së komisionit, kryetarja Arbreshë Kryeziu bëri të ditur se kjo ka qenë një kërkesë e përbashkët e deputetëve. Ajo shprehu shqetësimin se mosndëshkimi i personave përgjegjës për sulmin mund të krijojë rrezikun e përsëritjes së ngjarjeve të ngjashme në të ardhmen. Sulmi në Banjskë ndodhi më 24 shtator 2023, ku si pasojë e sulmit mbeti i vrarë rreshteri i Policisë së Kosovës, Afrim Bunjaku, ndërsa disa efektivë të tjerë u plagosën. Ndonëse kanë kaluar më shumë se 2 vite nga ngjarja kriminale, ende personat përgjegjës nuk i janë dorëzuar drejtësisë.