Në fushatat e fundit zgjedhore në Maqedoninë e Veriut, Albin Kurti ka mbështetur hapur rivalët e Ali Ahmetit, përkatësisht koalicionin Vlen dhe subjektet e tjera shqiptare. Megjithatë, kreu i Bashkimit Demokratik për Integrim ka lënë mënjanë hatërmbetjet me kryeministrin e Kosovës dhe i ka shprehur publikisht urimin për fitoren në zgjedhjet e së dielës. “Urime Lëvizjes Vetëvendosje dhe Kryeministrit Albin Kurti për fitoren e shënuar! Kosova ka nevojë për stabilitet, zhvillim dhe vizion të qartë shtetëror, në shërbim të qytetarëve të saj. Si dikush që ka dhënë kontribut për lirinë e Kosovës dhe që beson thellë në të ardhmen e saj, dëshiroj që Kosova të ecë përpara me hapa të sigurt, duke forcuar aleancën e saj strategjike me Shtetet e Bashkuara të Amerikës dhe me Bashkimin Evropian. Kjo është rruga që garanton paqe, zhvillim dhe një të ardhme të sigurt për brezat që vijnë. Kosova e lirë, e fortë dhe e zhvilluar, ka qenë dhe mbetet ëndrra jonë e përbashkët!”, shkruan kreu i BDI. Ahmeti përgëzon edghe qytetarët e Kosovës për procesin shembullor, të mature dhe me pjekuri të lartë demokratike.